Быйыл Дьокуускай куорат төрүттэммитэ 390 сыла. Хатас нэһилиэгэ киин куорат туллубат тулааһына буолан  тэҥҥэ үүнэр-сайдар, куораппыт килбиэннээх историятын ситэрсэр. Тапталлаах куораппыт бу бэлиэ үбүлүөйүгэр анаан Хатастааҕы «Кэрэчээнэ» уһуйааҥҥа «Мин Дьокуускайым» нэдиэлэ  ыытылла турар. Сарсыарда ахсын Дьокуускай куораты уруйдуур ырыанан оҕолору көрсөн нэдиэлэ устата араас сэһэргэһиилэр, дьарыктар буоллулар. » Тупса тур Дьокуускай куоратым», «Туймаада туоната» хаартысканан, «Якутск от А до Я» кинигэ, «Оҕо сааһым оонньуурдара» ретро оонньуурдар выставкалара оҕолор, үлэһиттэр болҕомтолорун тарта. Биир сүрүн тэрээһининэн «Дьокуускай устунан айан» квест оонньуу буолла. Оҕолор сарсыардаттан  «самолетка» олорон айаннаан командир, стюардесса көмөтүнэн Дьокуускай аэропордун кытта билсэн, «Арчы» дьиэтигэр сылдьан алгыстанан, салҕыы Үүнэр күлүөнэ, Ю.Платонов аатынан эстрада, П.А.Ойуунускай аатынан саха, А.С Пушкин аатынан нуучча театрдарыгар, Расторгуевтар ааттарынан циркаҕа, Модун уонна «Эллэй Боотур» муус дыбарыаһыгар, Е. М Ярославскай аатынан краеведческай музейга, А.С.Пушкин аатын сүгэр библиотекаҕа  иитээччилэрин тэрээһининэн оруоллаах оонньууга кытыннылар, сорудахтары толорон Дьокуускай туһунан элбэҕи биллилэр, үөрүүгэ-көтүүгэ кыттыстылар.

Айымньылаах нэдиэлэ «Кэрэчээнэ көмүс күһүнэ» литературнай тэрээһининэн түмүктэниэ. Оҕолор Дьокуускай, Хатас туһунан хоһоон күрэҕэр кыттыахтара.